Renato Elia - Helias das Licht

DEVENTE ARTIST ANCJE TU

Cul sisteme "Helias das Licht"

piçul cors pratic di Renato Elia / Helias dal Licht

"Gno pari al voleve vê un fi come "Giotto", invezit jo mi soi scuviert un "CIMABUE", cussì ta chest sisteme, o speri che o podedis cjatâ il Vuestri Artist….di cualsisei gjenar…" R.E.

Imparìn a zuiâ cu la Art de Fantasie

Il materiâl di usâ:

- un recipient pe aghe, grant
- colôrs a tempere primaris: blanc, blu, ros e zâl
- cjarte igjeniche
- fueis di disen
- pinei di variis misuris e formis par colôrs a aghe
- spatulis di variis misuris e formis

La procedure:

"Chel che al è biel nol è dite che al sedi san, ma chel che al è san al podarès jessi ancje biel"

Chest mût di dî nus permet di frontâ il nestri lavôr cun libertât, cence la necessitât di rivâ al risultât a ducj i coscj. La abitudin, imponude de culture scolastiche e ancje dai gjenitôrs, al è pretindi dai risultâts imediâts. Chest al compuarte pe persone che e subìs cheste richieste, un bloc psicofisic che spes al impedìs di organizâsi in maniere adate ae realtât, al rivâ a cognossi la proprie capacitât di savê cemût fâ.

"La art dal disegnâ e la art dal cusinâ a àn tant in comun"

Se o sin ce che o mangjìn alore il savê cusinâ san al è plui impuartant che presentâ plats e taulis imbandidis se dopo il mangjâ nol puarte salût.

Cussì e je pe Art. La Art e je aliment pal cjâf e jessint aliment al à di jessi preparât e ufiert par puartâ salût, ta chest câs, mentâl.

Vivi sans tal cuarp e tal cjâf al è come il cuarp che al à bisugne di cjaminâ parcè che cheste e je la sô funzion, il cjâf al à bisugne di cjatâ i siei trois dulà percori i spazis infinîts che nus à regalât la nature e l’univiers.


Il sisteme in se:

Si scomence cun doi sfueis separâts.

1. Sul prin cuntune matite o disegnìn dôs riis incrosadis in maniere di viodi cuatri cuadrâts. Nol è impuartant che lis riis a sedin dretis e i cuadrâts identics. Al interni di ogni cuadrât o metarìn un colôr primari.

Chest sfuei al rapresente un "negozi"

2. Tal secont sfuei o disegnarìn un cercli e dentri o sviluparìn i nestris tentatîfs artistics.

Chest sfuei al rapresente la "Pignate"

Dopo vê implenât di aghe il recipient grant, cjapìn la cjarte igjeniche e metìnle dongje.

Cul pinel o vin di imparâ a fâ un moviment, dopo vêlu metût intal recipient, fin a mieç, lu fasarìn sbati cuintri dal ôr.

Par intindisi miôr imagjinait di vê une cjampane ribaltade e bati, in maniere ritmiche cuntun len l'ôr…si sintarà il sun armoniôs de cjampane stesse, che si slargje dut ator. Cussì al à di jessi cul pinel e il recipient:

La "campane” e sune

Cheste funzion nus coventarà par tignî net il pinel.

Lant indenant, il pinel une volte netât te aghe al vignarà metût in contat cu la cjarte igjeniche par controlâ che al sedi net e nol vedi residuis di colôr.

Cumò o podìn lâ tal nestri negozi a cjoli dome un colôr a la volte. Il pinel tocjât cun chel colôr al vignarà puartât inte pignate e usât come un cop par produsi, dentri dal cercli, une serie di moviments par dâ une prime colorazion al sfuei n.2.


Il “cop” al va usât

Completât il moviment, si puarte il pinel tal recipient e dopo vêlu sbatût, come scrit parsore, o fasarìn il control su la cjarte igjeniche.

La Cjarte Igjeniche e je il Control

Se il pinel al sarà net o larìn tal nestri negozi a cjoli un altri colôr e o scomençarìn a lavorâ inte pignate.

Inte pignate o scomençarìn a viodi i prins jenfrisegns di colôr e i colôrs tal miscliçâsi a fasaran viodi infinidis sfumaduris:

Chest zuc al permetarà ae persone di impegnâsi e acuisî:

une costance te ripetizion dal moviment
un fâ mantignint net il sisteme di lavôr
a zuiâ liberementri
a produsi un risultât nassût de casualitât
a memorizâ sfumaduris, colôrs, segns
a dâ significâts al prodot finâl traviers l'ûs de imagjinazion

Il Zûc - la Libertât

Ae fin visìnsi che la aghe tal recipient e va gambiade spes

Se si vûl si pues usâ doi recipients.

Come che si pues constatâ ta cheste ativitât di base il contribût educatîf al ven traviers simbolisims ripetûts. La aghe, la pignate, il mangjâ, la pulizie, la cjarte igjeniche, dutis robis che tal cuotidian si usin ancje in maniere separade o in contescj diviers. Ma la esperience e devente maturitât cuant che o cjalin l'insiemit, il colassâ dal sisteme che si trasforme intune gnove vite.

E dopo a son lis rîs e i cerclis….

Bon lavôr e a prest Renato Elia (Helias das Licht)

Dedicât a dutis li frutis e i fruts dal futûr
(BBF)

(un sentito ringraziamento a Isa Dorigo x la traduzione in Friulano - renato)